Gynomix N12 vaginal şam

Dərman vasitəsinin istifadəsi üzrə təlimat (xəstələr üçün)

GİNOMİKS vaginal kapsullar GYNOMIX Beynəlxalq patentləşdirilməmiş adı: Neomycin sulfate + Nystatin + Polymyxin B sulfate

Tərkibi

Təsiredici maddələr: 1 kapsulda 50,2 mq neomisin sulfat (35 mq (35000 BV) neomisin şəklində), 100 000 BV nistatin, 35000 BV polimiksin B sulfat vardır. Köməkçi maddələr: sarı arı mumu, hidrogenizəedilmiş kokos yağı, dimetikon 1000, orta zəncirli triqliseridlər, jelatin, qatılaşdırılmış qliserin, metilparaben, propilparaben, xinolin sarısı, titan oksidi.

Təsviri

Tərkibində açıq-sarı rəngli maye olan ağ-süd rəngli oval vaginal kapsullardır.

Farmakoterapevtik qrupu

Nistatin digər preparatlarla kombinasiyada. ATC kodu: G01AA51.

Farmakoloji xüsusiyyətləri

Farmakodinamikası Antibakterial, bakterisid və antifunqal təsirə malik kombinəolunmuş preparatdır. Neomisin və polimiksin B qrammüsbət (Staphylococcus aureus və s.) və qrammənfi (Enterobacter aerogenes, Escherichia coli, Haemophilus influenzae, Ureaplasma urealyticum, Proteus vulgaris və s.) mikroorqanizmlərə qarşı bakterisid təsir göstərir. Nistatin patogen göbələklərə (Candida albicans, Cryptococcus və s.) qarşı funqisid təsir göstərir. Uşaqlıq yolunun selikli qişasında trofik prosesləri yaxşılaşdırır. Farmakokinetikası Yerli bakterisid və funqisid təsir göstərərək, uşaqlıq yolunun selikli qışasında bərabər paylanır. Uşaqlıq yolunun selikli qışasından praktiki olaraq sorulmur.

İstifadəsinə göstərişlər

Həssas mikroorqanizmlər tərəfindən törədilən vaginal infeksion- iltihabi xəstəliklər: Vaginal kandidoz Qeyri-spesifik vaginit Vulvovaginit.

Əks göstərişlər

Preparatın komponentlərindən hər hansı birinə qarşı yüksək həssaslıq.

Xüsusi göstərişlər və ehtiyat tədbirləri

Qısa müddətli müalicə kursu tövsiyə ounur, çünki ototoksik və nefrotoksik təsir müşahidə oluna bilər. Böyrək çatışmazlığı və ya sistem toksikliyi müşahidə edilə bilən xəstələr üçün tövsiyə edilmir. Yalnız müalicə effektinin faydaları riskdən üstün olduqda istifadə edin. Antibiotiklərə və ya analoji dərmanlara qarşı həssaslıq əlamətləri müşahidə edilərsə bu dərmanı istifadə edərkən diqqətli olun. Bakteriyalara qarşı rezistentliyin yaranmaması üçün preparatla müalicə müddəti qısa olmalı və mikroblara qarşı həssaslıq yoxlanılmalıdır. Ehtiyatlı olun, çünki bu dərman lateksdən hazırlanan qoruyucu vasitələrinin təsirini azalda bilər. Vaginal istifadə üçün nəzərdə tutulur (per oral istifadə etməyin). Menstruasiya müddətində preparatın istifadəsini dayandırmayın.

Digər dərman vasitələri ilə qarşılıqlı təsiri

Spermisidlərlə eyni vaxtda istifadəsi tövsiyə edilmir çünki, birlikdə istifadə zamanı dərmanın aktivliyi azala bilər.

Hamiləlik və laktasiya dövründə istifadəsi

Preparat hamiləlik və laktasiya dövründə istifadə edilməməlidir.

Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri

Preparatın nəqliyyat vasitələrini və digər mexanizmləri idarəetmə qabiliyyətinə təsiri barədə məlumat yoxdur.

İstifadə qaydası və dozası

Qadınlarda bir kapsul gündə 1 dəfə yatmazdan əvvəl uşaqlıq yoluna dərinə yeridilir. Müalicə kursu 6 gün təşkil edir. Xroniki infeksiyalar zamanı gündə 1 kapsul (axşam) 12 gün müddətində.

Əlavə təsirləri

Əlavə təsirlərin tezliyi aşağıdakı parametrlərlə təyin edilir: çox tez-tez (≥1/10); tez-tez (≥1/100 – <1/10), bəzən (≥1/1 000 – <1/100); nadir hallarda (≥1/10 000 – <1/1000); çox nadir hallarda (<1/10 000); məlum deyil (əldə olan məlumatlara görə tezliyi qiymətləndirmək mümkün deyil). Allergik simptomlar. Uzun müddət istifadə zamanı allergik ekzematoz kontakt dermatit müşahidə oluna bilər. Yerli reaksiyalar: yanma hissi, qaşınma, qıcıqlanma, qızartı, ödem.

Doza həddinin aşılması

Doza həddinin aşılması haqqında məlumat yoxdur. Xüsusilə böyrək çatışmazlığı olan pasiyentlərdə sistem effektlər (oto- və nefrotoksiklik yarana bilər).

Buraxılış forması

6 vaginal kapsul, blisterdə. 2 blister, içlik vərəqə ilə birlikdə karton qutuya qablaşdırılır.

Saxlanma şəraiti

30° C-dən yüksək olmayan temperaturda və uşaqların əli çatmayan yerdə saxlanılmalıdır.

Yararlılıq müddəti

3 il. Yararlılıq müddəti bitdikdən sonra istifadə etmək olmaz.

Aptekdən buraxılma şərti

Resept əsasında buraxılır.

İstehsalçı

Kolmar Pharma Co., Ltd. 93, Biovalley 2-ro, Jecheon-si, Chungcheongbuk-do, Koreya Respublikası.