Qliserin 50 ml məhlul Azərfarm

Dərman vasitəsinin istifadəsi üzrə təlimat (xəstələr üçün)

TİBBİ QLİSERİN yerli istifadə üçün məhlul Beynəlxalq patentləşdirilməmiş adı: Glycerol

Tərkibi

Təsiredici maddə: 100 q məhlulun tərkibində 86 q qliserin vardır. Köməkçi maddələr: distillə olunmuş su.

Təsviri

Rəngsiz, özlü (şərbətəbənzər), iysiz, şirin dadlı, hiqroskopik məhluldur.

Farmakoterapevtik qrupu

Yerli istifadə üçün vasitə.

Farmakoloji xüsusiyyətləri

Farmakodinamikası Qliserin həm 30%-li sulu məhlul, həm də mineral və üzvi maddələr daşıyan, suda və qliserində həll olan liniment və məlhəm əsası kimi dəriyə yumşaldıcı təsir göstərir. Qliserin həmçinin xaricə istifadə olunan bor turşusunun, protarqolun, taninin həlledicisi kimi istifadə olunur. Farmakokinetikası Qliserin dəridən sorulmur, ancaq selikli qişadan asanlıqla sorulur.

İstifadəsinə göstərişlər

Qliserin xaricə dəri və selikli qişanı yumşaldıcı kimi istifadə olunan liniment və məlhəmlərin hazırlanması zamanı müvafiq olaraq liniment və məlhəm əsası kimi istifadə olunur. Həmçinin, qəbizlik zamanı imalə şəklində işlədici kimi istifadə olunur.

Əks göstərişlər

Preparata qarşı həssaslıq. Dərinin açıq yaraları. Babasil (kəskinləşmə dövründə, anus çatları, düz bağırsağın iltihab xəstəlikləri və şişləri).

İstifadə qaydası və dozası

Böyüklərdə xaricə applikasiya şəklində quru dəriyə istifadə olunur. Qəbizlik zamanı imalə şəklində istifadə olunur (2-5 ml).

Əlavə təsirləri

Xaricə istifadə zamanı qıcıqlanma, allergik reaksiyalar kimi əlavə təsirlər müşahidə olunarsa, sonrakı istifadəsinin davam etdirilməsi üçün həkimlə məsləhətləşmək lazımdır. Uzun müddətli rektal istifadə zamanı düz bağırsağın qıcıqlanması, defekasiya fizioloji prosesinin zəifləməsi mümknüdür.

Doza həddinin aşılması

Müşahidə olunmayıb.

Buraxılış forması

25 q və ya 50 q məhlul, flakonda. Müvafiq sayda flakon və içlik vərəqə birlikdə karton qutuya qablaşdırılır.

Saxlanma şəraiti

20-25 °C-dən aşağı temperaturda, möhkəm bağlanmış flakonda və uşaqların əli çatmayan yerdə saxlamaq lazımdır.

Yararlılıq müddəti

5 il. Yararlılıq müddəti bitdikdən sonra istifadə etmək olmaz.

Aptekdən buraxılma şərti

Reseptsiz buraxılır.

İstehsalçı

«Azərfarm»MMC, Azərbaycan Respublikası, Bakı ş., Bakıxanov qəs., Bünyadov küç.,14.