Diabeton MR 60 mq N30 tablet

Dərman vasitəsinin istifadəsi üzrə təlimat (xəstələr üçün)

Preparatın qəbuluna başlamazdan öncə bu təlimatları sonadək diqqətlə oxuyun. • Bu içlik vərəqəni atmayın, o Sizə yenə lazım ola bilər. • Əgər əlavə suallarınız yaranarsa, müalicə həkiminizə və ya əczaçıya müraciət edin. • Bu preparat Sizə təyin olunarkən məhz sizin istifadəniz üçün nəzərdə tutulmuşdur. Onu istifadə üçün digər şəxslərə verməyin. Bu, həmin şəxslərin simptomları Sizinkinə oxşar olsa belə, onlar üçün zərərli ola bilər. • Əgər əlavə təsirlər ciddi xarakter alarsa və ya bu içlik vərəqədə qeyd edilməyən əlavə təsirlər müşahidə edərsəniz, bu haqda müalicə həkiminizə və ya əczaçıya məlumat verin (“Əlavə təsirləri” bölməsinə bax) MR 60 mq təsiredici maddəsi modifikasiya olunmuş şəkildə xaric olanDİABETON MR tabletlərDIABETON Beynəlxalq patentləşdirilməmiş adı: Gliclazide

Tərkibi

Təsiredici maddə: 1 tabletin tərkibində 60 mq qliklazid vardır. Köməkçi maddələr: laktoza monohidrat, maltodekstrin, hipromelloza 100 cp, maqnezium stearat, susuz kolloidal silisium dioksid.

Təsviri

Ağ rəngli uzunsov tabletlərdir, uzunluğu 15 mm və eni 7 mm, hər iki üzündə bölmə xətti və “DIA 60” işarəsi vardır.

Farmakoterapevtik qrupu

Peroral antidiabetik preparat. Sulfonil-sidik cövhərinin törəməsi. ATC kodu: A10BB09.

Farmakoloji xüsusiyyətləri

Təsir mexanizmi Qliklazid digər əlaqədar tərkiblərdən endosiklik birləşmə ilə N tərkibli heterosiklik həlqə ilə fərqlənən hipoqlikemik sulfonil sidik cövhəri peroral diabetəleyhinə təsiredici maddədir. Qliklazid Langerhans adacıqlarının β hüceyrələrindən insulin ifrazını stimulasiya etməklə qanda şəkərin səviyyəsini azaldır. Qida qəbulu sonrası insulin və C-peptid ifrazında artım müalicədən iki ay sonra davam edir. Bu metabolizm xüsusiyyətlərinə əlavə olaraq qliklazid hemovaskulyar xüsusiyyətlərə də malikdir.

İstifadəsinə göstərişlər

DİABETON MR 60 mq-lıq tabletləri qanda şəkərin səviyyəsinin azaldılması üçün nəzərdə tutulmuş dərman vasitəsidir (sulfonil-sidik cövhəri qrupundan olan antidiabetik peroral preparat). DİABETON MR 60 mq-lıq tabletləri böyüklərdə şəkərli diabetin bəzi formaları (II tip diabet) zamanı pəhrizin gözlənilməsi, fiziki gərginlik və çəki itirilməsinin qanda şəkərin səviyyəsinə adekvat şəkildə nəzarət edilməsi üçün kifayət etmədiyi hallarda istifadə edilir.

Əks göstərişlər

DİABETON MR 60 mq-lıq, təsiredici maddəsi modifikasiya olunmuş şəkildə xaric olan tabletlər aşağıdakı hallarda istifadə edilməməlidir: − əgər qliklazidə, DİABETON MR 60 mq-lıq tabletlərin istənilən digər komponentinə, bu qrupdan (sulfonil-sidik cövhəri) olan digər preparatlara və ya digər oxşar preparatlara (hipoqlikemik sulfonamidlər) qarşı allergiyanız varsa (həssaslığın yüksəlməsi); − əgər insulindən asılı diabetdən (I tip) əziyyət çəkirsinizsə; − əgər sidik materialınızda keton cisimcikləri və ya şəkər aşkar olunmuşsa (bu, Sizdə diabetik ketoasidozun olduğunun göstəricisi ola bilər), diabetik koma və ya prekoma halında; − əgər böyrək və ya qaraciyərinizdə ciddi bir xəstəlik varsa; − əgər göbələk infeksiyalarının müalicəsi üçün dərman vasitəsi qəbul edirsinizsə (mikonazol, “Digər dərman vasitələri ilə qarşılıqlı təsiri” bölməsinə baxın); − əgər uşaq əmizdirirsinizsə (“Hamiləlik və laktasiya dövründə istifadəsi” bölməsinə baxın).

Xüsusi göstərişlər və ehtiyat tədbirləri

DİABETON MR 60 mq-lıq tabletlərin qəbuluna başlamazdan əvvəl həkimlə məsləhətləşin. Qanda şəkərin səviyyəsinin normallaşdırılması üçün həkiminiz tərəfindən təyin edilmiş müalicə planına riayət etməlisiniz. Bu o deməkdir ki, tabletlərin müntəzəm qəbulu ilə yanaşı, Siz həm də pəhriz rejiminizə riayət etməli, fiziki məşğələlərlə məşğul olmalı və zərurət olduğu hallarda çəki itirməlisiniz. Qliklazidlə müalicə müddəti ərzində qanda (və əgər lazım gələrsə, sidikdə) şəkərin, eləcə də qlikogenləşmiş hemoqlobinin (HbA1c) səviyyəsinin mütəmadi müşahidə altında saxlanılması vacibdir. Müalicənin ilk həftələrində qanda şəkərin səviyyəsinin aşağı salınması riski (hipoqlikemiya) var, belə ki, tibbi nəzarət lazımdır. Şəkərin səviyyəsinin enməsi aşağıdakı hallarda baş verə bilər: − qida qəbulunun qeyri-müntəzəm olması və ya qida qəbulunun ötürülməsi; − qida qəbulundan imtina etmə; − pis qidalanma; − qidanın tərkibinin dəyişdirilməsi; − karbohidrat qəbulunu adaptə etmədən fiziki gərginliyin artırılması; − spirtli içki qəbul edilməsi, xüsusilə də bu hal qida qəbulunun buraxılması ilə müşayiət olunarsa; − eyni zamanda digər tibbi və ya təbii preparat qəbul edilməsi; − həddən artıq yüksək miqdarda qliklazid qəbulu; − hormondan asılı pozğunluqların (qalxanabənzər vəzi, hipofiz və ya böyrəküstü vəzilərin qabıq maddəsinin funksional pozğunluqlar) mövcudluğu; − ağır böyrək və ya qaraciyər pozğunluğunun olması. Qanda şəkərin səviyyəsi həddən artıq aşağı olduqda aşağıdakı simptomlar meydana çıxa bilər: Baş ağrısı, güclü aclıq hissi, ürəkbulanma, qusma, yorğunluq, yuxu pozulmaları, narahatlıq, aqressivlik, diqqət cəmləmənin pozulması, diqqətin və reaksiya vermə qabiliyyətinin azalması, depressiya, şüurun dumanlanması, nitq və ya görmənin pozulması, tremor, hissiyyat pozğunluqları, başgicəllənmə və özünü köməksiz hissetmə. Həmçinin, aşağıdakı əlamət və klinik təzahürlər meydana çıxa bilər: tər ifrazının artması, dərinin soyuq və nəm olması, həyəcanlılıq, ürək döyütülərinin tezləşməsi və qeyri-müntəzəmliyi, arterial təzyiqin yüksək olması, döş qəfəsində bədənin yaxında yerləşən nahiyələrinə yayılan qəfil güclü ağrı (stenokardiya). Əgər qanda şəkərin səviyyəsi enməkdə davam edirsə, sizdə huşun nəzərəçarpacaq dərəcədə qaranlıqlaşması (delirium), qıcolmalar, özünə nəzarətin itirilməsi, tənəffüsün səthiləşməsi, ürək yığılmalarının ləngiməsi baş verə və huşunuzu itirə bilərsiniz. Əksər hallarda qanda şəkərin səviyyəsinin enməsinin klinik təzahürləri istənilən formada, məsələn, qlükoza tabletləri, bir tikə qənd, şirin şirə və ya şirin çay formasında olmaqla şəkər qəbulundan sonra tez bir zamanda keçib gedir. Bu səbəbdən də özünüzlə hansı şəkildə olmasından (qlükoza tabletləri, qənd tikələri) asılı olmayaraq hər zaman şəkər gəzdirməlisiniz. Yadda saxlayın ki, süni şəkərlər effektsizdir. Əgər şəkər qəbulu kömək etmirsə və ya simptomlar təkrarən meydana gəlməyə başlayırsa, həkiminizlə əlaqə saxlayın və ya ən yaxında yerləşən xəstəxanaya müraciət edin. Qanda şəkərin səviyyəsinin azalma əlamətləri heç olmaya, zəif nəzərə çarpa və ya ləng meydana gələ bilər, yaxud da siz qanda şəkərin səviyyəsinin endiyini dərhal başa düşməyə bilərsiniz. Bu hal bəzi dərman preparatlarını, məsələn, mərkəzi sinir sisteminə təsir göstərən preparatlar və β-blokatorları qəbul edən ahıl yaşlı xəstələrdə müşahidə oluna bilər. Əgər stress vəziyyətinə düşmüsünüzsə (məsələn, bədbəxt hadisə, cərrahi əməliyyat, həddən artıq isti və s.) həkim müvəqqəti olaraq sizə insulin terapiyası təyin edə bilər. Qanda şəkərin səviyyəsinin yüksəlməsinin klinik təzahürləri (hiperqlikemiya) qliklazidin şəkərin səviyyəsini hələ kifayət qədər endirə bilmədiyi hallarda, sizə həkim tərəfindən təyin olunmuş müalicə planına riayət etmədikdə, Dazıotu (Hypericum perforatum) preparatları qəbul edirsinizsə və ya bir sıra stress vəziyyətlərdə meydana gələ bilər. Mümkün əlamətlərə aşağıdakılar daxildir: susuzluq, tez-tez sidiyə getmə, ağızda quruluq, dəridə quruluq və qaşınma, dəri infeksiyaları və effektivliyin azalması. Gliklazidin flüoroxinolon antibiotikləri ilə birlikdə, xüsusən də yaşlılarda təyin edərkən, şəkərin səviyyəsini (şəkərin səviyyəsinin artması və ya azalması) pozulması ola bilər. Belə vəziyyətdə qlükoza səviyyəsini nəzarət etmək lazımdır. Əgər yuxarıda qeyd edilən əlamətləri özünüzdə müşahidə edirsinizsə, müalicə həkiminizə və ya əczaçıya müraciət edin. Əgər sizdə və ya qohumlarınızda qlükoza-6-fosfatdehidrogenazanın irsi çatışmazlığı (Q6FD – eritrositlərin normal xüsusiyyətlərini itirməsi) varsa, o zaman orqanizminizdə hemoqlobinin səviyyəsi düşə və eritrositlərin sayı azala bilər (hemolitik anemiya). Bu preparatı qəbul etməzdən öncə həkiminizlə əlaqə saxlayın. Porfiriya olan xəstələrdə (bədəndə porfirin və porfirinin prekursorların toplandığı irsi genetik xəstəlikdir) bəzi digər sulfanil-sidik cövhəri qrupundan olan preparatların qəbulunun nəticəsində kəskin porfiriya halları. DİABETON MR 60 mq-lıq, modifikasiya olunmuş şəkildə xaric olan tabletlərin uşaqlara təyini tövsiyə edilmir, belə ki, bu istiqamətdə məlumatlar mövcud deyildir. DİABETON MR 60 mq-lıq, modifikasiya olunmuş şəkildə xaric olan tabletlərin tərkibinə daxil olan bəzi komponentlərə dair vacib məlumat DİABETON MR 60 mq-lıq tabletlərin tərkibində laktoza vardır. Əgər həkiminiz sizə şəkərlərin bəzi növlərinə qarşı davamsızlığınızın olduğuna dair məlumat vermişsə, o halda bu dərman vasitəsinin qəbuluna başlamazdan əvvəl müalicə həkiminizlə məsləhətləşin.

Digər dərman vasitələri ilə qarşılıqlı təsiri

Hətta əgər reseptsiz buraxılan dərman vasitəsi olsa belə, hazırda və ya yaxın keçmişdə hansı dərman vasitələrini qəbul etdiyinizə dair müalicə həkiminiz və ya əczaçınızı həmişə məlumatlandırın, belə ki, onlar DİABETON MR 60 mq -lıq, modifikasiya olunmuş şəkildə xaric olan tabletlərlə qarşılıqlı təsirə girə bilərlər. Əgər aşağıdakı dərman preparatlarından birini qəbul edirsinizsə, qliklazidin hipoqlikemik effektinin güclənməsi baş verə və qanda şəkərin səviyyəsinin azalmasının klinik əlamətləri meydana çıxa bilər: – qanda şəkərin səviyyəsinin qalxması zamanı müalicə üçün istifadə edilən digər preparatlar (peroral antidiabetik preparatlar, HPP-1 reseptoru aqonistləri və ya insulin); – antibiotiklər (məsələn, sulfonamidlər, klaritromisin); – arterial təzyiqin yüksəlməsi və ya ürək çatışmazlığı zamanı istifadə edilən preparatlar (β- blokatorlar, kaptopril və ya enalapril kimi AÇF inhibitorları); – göbələk infeksiyalarının müalicəsi üçün istifadə edilən preparatlar (mikonazol, flukonazol); – mədə və ya onikibarmaq bağırsaq xorasının müalicəsi üçün istifadə edilən preparatlar (H -2 reseptorların antaqonistləri); – depressiyanın müalicəsi üçün istifadə edilən preparatlar (monoamin oksidazanın inhibitorları); – ağrıkəsici və ya revmatizm əleyhinə preparatlar (fenilbutazon, ibuprofen); – tərkibində alkoqol olan preparatlar. Əgər aşağıdakı dərman preparatlarından birini qəbul edirsinizsə, qliklazidin hipoqlikemik effekti zəifləyə və qanda şəkərin səviyyəsinin yüksəlməsi müşahidə edilə bilər: – mərkəzi sinir sistemi pozğunluqlarının müalicəsi üçün nəzərdə tutulmuş preparatlar (xlorpromazin); – iltihab əleyhinə vasitələr (kortikosteroidlər); – astmanın müalicəsində və ya doğuş zamanı təyin edilən dərman preparatları (venadaxili salbutamol, ritodrin və terbutalin); – süd vəzisinin patologiyaları, güclü aybaşılar və endometrioz zamanı tətbiq edilən preparatlar (danazol); – Dazıotu (Hypericum perforatum) preparatları. Xüsusilə yaşlılarda flüoroxinolonlar qrupundan olan antibiotiklərlə eyni vaxtda DIABETON MR 60 mg tabletləri qəbul edərkən qanda qlükoza səviyyəsinin pozulması (qan şəkərinin səviyyəsinin artırılması və ya azaldılması) ola bilər. DİABETON MR 60 mq-lıq, modifikasiya olunmuş şəkildə xaric olan tabletlər qanın laxtalanmasını azaldan (durulaşdıran) preparatların (məsələn, varfarin) təsirini gücləndirə bilər. Digər dərman vasitəsinin qəbuluna başlamazdan əvvəl müalicə həkiminizlə məsləhətləşin. Əgər xəstəxanaya müraciət etsəniz, DİABETON MR 60 mq-lıq tabletləri qəbul etdiyinizə dair tibb personalını məlumatlandırın.

Hamiləlik və laktasiya dövründə istifadəsi

DİABETON MR 60 mq-lıq, modifikasiya olunmuş şəkildə xaric olan tabletlərin hamiləlik zamanı qəbulu tövsiyə edilmir. Əgər hamiləlik planlaşdırırsınızsa və ya hamilə olduğunuz faktı təsdiqlənmişsə, Sizə daha uyğun müalicə üsulunun seçilməsi üçün bu barədə həkiminizə məlumat verin. Əgər uşaq əmizdirirsinizsə, DİABETON MR 60 mq-lıq, modifikasiya olunmuş şəkildə xaric olan tabletləri qəbul etməməlisiniz.

Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri

Əgər qanınızda şəkərin səviyyəsi həddən artıq yüksəlmiş (hiperqlikemiya) və ya enmişsə (hipoqlikemiya), yaxud da qeyd edilən vəziyyətlərin nəticəsi olaraq görməniz pozulmuşsa diqqətinizi cəmləmə və ya reaksiya vermə qabiliyyətiniz azala bilər. Yadda saxlayın ki, bu zaman özünüzün və digərlərinin həyatını təhlükə altına ala bilərsiniz (avtonəqliyyat və ya mexanizm idarə edərkən). Əgər Sizdə aşağıdakı hallar müşahidə edilirsə, avtomobil idarə edə bilib-bilməyəcəyinizlə əlaqədar müalicə həkiminizin tövsiyələrini alın: – qanda şəkərin səviyyəsinin tez-tez düşməsi (hipoqlikemiya); – qanda şəkərin səviyyəsinin düşməsi (hipoqlikemiya) əlamətləri azdırsa və ya ümumiyyətlə müşahidə edilmirsə.

İstifadə qaydası və dozası

DİABETON MR 60 mq-lıq, modifikasiya olunmuş şəkildə xaric olan tabletlərin qəbulu zamanı həkim təlimatlarına həmişə ciddi riayət edin. Əgər dərman vasitəsinin düzgün qəbuluna dair şübhələriniz varsa, həkim və ya əczaçı ilə məsləhətləşməlisiniz. Həkim müalicəvi dozanı qanda, eləcə də ola bilsin ki, sidikdə şəkərin miqdarına əsasən müəyyən edir. Xarici faktorların istənilən şəkildə dəyişməsi (çəkinin azalması, həyat tərzinin dəyişdirilməsi, stress) və ya şəkərin səviyyəsinin yaxşılaşması qliklazidin dozasının dəyişdirilməsini tələb edə bilər. Adətən doza yarım tabletdən 2 tabletədək (maksimum 120 mq) olmaqla gündə bir dəfə səhər yeməyi zamanı qəbulu nəzərdə tutulur. Bu, müalicəyə yatımlılıqdan asılıdır. Tövsiyə olunan başlanğıc doza – gündə 30 mq-dır. Qlikemiyaya effektiv nəzarət zamanı onu dəstəkləyici doza kimi istifadə etmək olar. Əgər qlikemiyaya adekvat nəzarət əldə edilməzsə, o zaman dozanı 60, 90 və ya 120 mq/gün-ə qədər yüksəltmək olar. İki həftəlik müalicədən sonra qanda qlükozanın səviyyəsinin enmədiyi hal istisna olmaqla, dozanın ardıcıl yüksəldilmələri arasındakı interval 1 aydan az olmamalıdır. Belə hallarda dozanı artıq müalicənin başlanmasından 2 həftə sonra yüksəltmək olar. Maksimal tövsiyə olunan gündəlik doza 120 mq təşkil edir. DİABETON MR 60 mq-lıq, modifikasiya olunmuş şəkildə xaric olan tabletlərin alfa-qlikozidazanın inhibitoru olan metformin, tiazolidindion, dipeptidaza IV inhibitoru, HPP-1 reseptoru aqonisti və ya insulinlə birlikdə qəbulu hallarında həkim fərdi olaraq Sizin üçün hər bir preparatın lazımi dozasını müəyyən edir. DİABETON MR 60 mq-lıq, modifikasiya olunmuş şəkildə xaric olan tabletlərin qida və içkilərlə birlikdə qəbulu DİABETON MR 60 mq-lıq, modifikasiya olunmuş şəkildə xaric olan tabletlər qida və tərkibində spirt olmayan içkilərlə birlikdə qəbul edilə bilər. Spirt istifadəsi tövsiyə edilmir, belə ki, o Sizdə olan şəkərli diabetə nəzarət prosesinə qabaqcadan proqnozlaşdırıla bilməyən şəkildə mane ola bilər. DİABETON MR 60 mq-lıq, modifikasiya olunmuş şəkildə xaric olan tabletləri qəbul etməyi unutmusunuzsa Şəkərli diabetin müalicəsi adətən ömürlük davam edən bir proses olduğuna görə, bu preparatın qəbulunun dayandırılmasından öncə müalicə həkiminizlə məsləhətləşməlisiniz. Müalicənin dayandırılması qanda şəkərin miqdarının artmasına (hiperqlikemiya) səbəb ola bilər. Əgər preparatın qəbulu ilə bağlı əlavə suallarınız yaranarsa, müalicə həkiminizə və ya əczaçınıza müraciət edin.

Əlavə təsirləri

Digər dərman vasitələri kimi, DİABETON MR 60 mq-lıq, təsiredici maddəsi modifikasiya olunmuş şəkildə xaric olan tabletlərin də bütün xəstələrdə təsadüf etməsə də müəyyən əlavə təsirləri mövcuddur. Əlavə təsirlər arasında ən çox qanda şəkərin səviyyəsinin düşməsi (hipoqlikemiya) təsadüf edilir. Klinik əlamətləri “Xüsusilə göstərişlər” başlıqlı bölmədə təsvir edilir). Müalicə aparılmadığı təqdirdə bu klinik əlamətlər yuxuculluq, huşun itməsi və hətta koma ilə nəticələnə bilər. Əgər qanda şəkərin səviyyəsinin düşməsi epizodu həddən artıq ağır keçirsə və ya həddən artıq uzun müddət davam edirsə, hətta bu hal şəkər qəbulu vasitəsilə müvəqqəti yüngülləşdirildikdə belə dərhal tibbi yardım üçün müraciət edilməlidir. Qaraciyər pozğunluqları Tək-tək hallarda qaraciyərin funksional göstəricilərinin normadan kənara çıxması haqda məlumat vardır ki, bu hal da dəri və sklerada (gözlərdə) sarılıq əmələ gəlməsinə səbəb olur. Əgər təsvir edilən hal baş verərsə, dərhal müalicə həkiminizə müraciət edin. Adətən bu simptomlar preparatın qəbulu dayandırıldıqdan sonra keçib gedir. Müalicənin dayandırılmasının lazım olub-olmadığını həkiminiz müəyyən etməlidir. Dəri pozğunluqları Səpgi, qızartı, qaşınma, övrə və angioödem (toxumaların, məsələn, göz qapaqları, dodaqlar, ağız boşluğu, dil və ya boğazın sürətlə ödemi; sonuncu tənəffüs çətinləşməsinə gətirib-çıxara bilər) kimi dəri reaksiyalarının baş verdiyinə dair məlumatlar daxil olmuşdur. Səpgi generalizə olunmuş forma ala və qovuqcuqlar və qabıq əmələ gəlməsi ilə müşayiət oluna bilər. Əgər bu hal müşahidə olunarsa, Diabeton MR 60 mg qəbulunu dayandırın və təcili həkimə müraciət edin. Müstəsna hallarda, qripəbənzər simptomlar və sonra yüksək temperatur ilə ümumi bir reaksiyaları (DRESS) aşkar oluna bilər. Qanın tərkibində pozğunluqlar Qan hüceyrələrinin (trombosit, eritrosit və leykositlər) miqdarının azalması barədə məlumat mövcuddur ki, sonuncu da rəngin solğunluğuna və uzunmüddətli qanaxmaya səbəb ola bilər. Bundan başqa qançırlar, boğaz ağrısı və hərarətin yüksəlməsi halları da təsadüf edə bilər. Adətən, bu simptomlar preparatın qəbulu dayandırıldıqdan sonra keçib gedir. Mədə-bağırsaq pozğunluqları Qarın nahiyəsində ağrı, ürəkbulanma, qusma, mədədə həzmin pozulması, ishal və qəbizlik baş verə bilər. Bu əlamətlər rast gəlinməsi, DİABETON MR 60 mq-lıq, modifikasiya olunmuş şəkildə xaric olan tabletlərin qəbulu, hazırki təlimatda da tövsiyə edildiyi kimi, qida qəbulu ilə eyni vaxta təsadüf etdikdə azalır. Oftalmoloji pozğunluqlar Görməniz qısamüddətli olaraq, xüsusilə müalicənin başlanğıc dövrlərində pozula bilər. Bu effekt qanda şəkərin səviyyəsinin dəyişməsi ilə əlaqədardır. Sulfonil sidik cövhərinin qəbulu zamanı qan hüceyrələrinin miqdarında ağır dəyişikliklərin və qan damarlarının divarlarında allergik iltihabın baş verməsi hallarına rast gəlinmişdir. Qaraciyər fəaliyyətinin sulfonil sidik cövhərinin qəbulunun dayandırılmasından sonra keçib-gedən pozulması (məsələn, sarılıq) baş vermişdir; lakin bəzi hallarda bu vəziyyətin həyat üçün təhlükəli qaraciyər çatışmazlığına qədər inkişaf etməsi də təsadüf etmişdir. Əlavə təsirlər barədə məlumatın verilməsi Hər hansı əlavə təsir müşahidə etsəniz, bu barədə öz həkiminizə, əczaçıya və ya tibb bacısına məlumat verin. Bura bu içlik vərəqədə sadalanmayan istənilən arzuolunmaz təsir də aiddir. Əlavə təsirlər barədə məlumat verməklə Siz pasiyentlərin bu dərmanın təhlükəsizliyinə dair daha çox məlumatla təmin edilməsinə kömək edə bilərsiniz.

Doza həddinin aşılması

Əgər həddən çox miqdarda tablet qəbul etmisinizsə, ən yaxınlıqda yerləşən təcili yardım məntəqəsi ilə əlaqə yaradın və ya bu haqda dərhal müalicə həkiminizi xəbərdar edin. İfrat dozalanma əlamətlərinə qanda şəkərin səviyyəsinin düşməsinin (hipoqlikemiya) bu təlimatın “Xüsusi xəbərdarlıq” bölməsində təsvir edilən əlamətləri aiddir. Belə klinik təzahürlərin yüngülləşdirilməsi üçün dərhal qənd qəbul etmək (4-6 tikə) və ya şirin su içmək, bundan sonra isə yaxşı qəlyanaltı etmək və ya tam yemək şəklində qida qəbul etmək olar. Əgər xəstə huşunu itirmiş vəziyyətdədirsə, o zaman dərhal həkimi xəbərdar edin və ya təcili yardım çağırın. Əgər kimsə, məsələn, uşaq təsadüfən bu preparatı qəbul etmişsə, eyni tədbirləri görün. Huşunu itirmiş xəstəyə su içirmək və ya onu yedirmək olmaz. Belə vəziyyətin ola biləcəyi haqda məlumatlandırılan və zərurət olduğu halda həkim çağıra biləcək bir adamın olmasının qabaqcadan qayğısına qalmaq məqsədəuyğundur.

Buraxılış forması

15 tablet, konturlu-yuvalı qablaşdırmada. 2 və ya 4 konturlu-yuvalı qablaşdırma, içlik vərəqə ilə birlikdə karton qutuya qablaşdırılır. Satışda qablaşdırmaların bütün ölçüləri olmaya bilər.

Saxlanma şəraiti

30°C-dən yüksək olmayan temperaturda və uşaqların əli çatmayan yerdə saxlamaq lazımdır.

Yararlılıq müddəti

3 il. Yararlılıq müddəti bitdikdən sonra istifadə etmək olmaz. Yararlılıq müddətinin bitmə tarixi göstərilən ayın son gününə şamil edilir.

Aptekdən buraxılma şərti

Resept əsasında buraxılır.

İstehsalçı

Les Laboratoires Servier, France 905, route de Saran, 45520 Gidy, France Qablaşdırılıb R-PHARM MMC, Azərbaycan, Bakı şəhəri, Pirallahı rayonu Pirallahı qəsəbəsi Səməd Vurğun küçəsi 51

Qeydiyyat vəsiqəsinin sahibi

Le Laboratuar Servye. 50, rue Carnot 92284 Suresnes cedex– France – Fransa.