Propanorm 150 mq N50 tablet

Dərman vasitəsinin istifadəsi üzrə təlimat (xəstələr üçün)

PROPANORM örtüklü tabletlər Beynəlxalq patentləşdirilməmiş adı: Propafenone hydrochloride

Tərkibi

Təsiredici maddə: 1 tabletin tərkibində 150 mq və ya 300 mq propafenon hidroxlorid vardır. Köməkçi maddələr: qranullaşdırılmış mikrokristallik sellüloza, qarğıdalı nişastası, natrium kroskarmelloza, kopovidon, maqnezium stearat, natrium laurilsulfat. Örtük: hipromelloza 5, titan dioksid, makroqol 6000.

Təsviri

Demək olar ki, ağ rəngli, hər iki tərəfi qabarıq örtüklü tabletlərdir.

Farmakoterapevtik qrupu

IC sinif antiaritmik preparatlar. ATC kodu: C01BC03.

Farmakoloji xüsusiyyətləri

Farmakodinamikası Propanorm® membranstabilləşdirici və natrium kanallarını blokada edici effektlərə malik aritmiyaəleyhinə preparatdır (Voqan-Vilyams təsnifatına əsasən IC sinfi). Propafenon təsir potensialının artmasını ləngidir və bunun nəticəsində impulsların keçirilmə sürəti aşağı düşür (mənfi dromotrop effekt); bu preparatın təsiri altında qulaqcıqlarda, atrioventrikulyar düyündə və mədəciklərdə refrakter mərhələ uzanır. Propafenon, Volf-Parkinson-Vayt (WPW) sindromu qeyd olunan pasiyentlərdə əlavə yolların refrakter mərhələsinin uzanmasına səbəb olur Farmakokinetikası Absorbsiyası Qan plazmasında maksimal konsentrasiyaları propafenonun istifadəsindən 2-3 saat sonra əldə olunur. Propafenon əsasən, presistem metabolizmə məruz qalır (CYP2D6 izoferment vasitəsi ilə qaraciyərdən ilk keçid metabolizmi) və bu səbəbdən, onun mütləq biomənimsənilməsi preparatın dozasından və yeridilmə yolundan asılıdır. Bir dozanın istifadəsinin tədqiqi zamanı qida qəbulunun preparatın qan plazmasında maksimal konsentrasiyasını və biomənimsənilməsini artırmasına baxmayaraq, propafenonun dəfələrlə təkrar dozalarının sağlam şəxslər tərəfindən istifadəsi zamanı qida qəbulu preparatın biomənimsənilməsinə əhəmiyyətli təsir göstərməmişdir. Paylanması Propafenon orqanizmdə sürətlə paylanır. Tarazlıq vəziyyətində paylanma həcmi 1,9 l/kq/dan 3 l/kq-a qədər dəyişir. Preparatın plazma proteinləri ilə birləşməsi konsentrasiyadan asılıdır və 0,25 nq/ml olduqda 97,3 %-dən 100 nq/ml zamanı 91,3 %-ə qədər aşağı düşür. Biotransformasiyası Propafenon iki genetik cəhətdən determinasiyaolunmuş üsulla metabolizmə məruz qalır. Pasiyentlərin 90 %-dən çoxunda həmin maddə 2-10 saat təşkil edən yarımxaricolma dövrü ilə sürətlə xaric olunur (yəni, sürətli metabolizatorlar). Bu zaman iki aktiv metabolit əmələ gəlir – CYP2D6 izoferment vasitəsi ilə 5-hidroksipropafenon əmələ gəlir və CYP3A4 və CYP1A2 izofermentlər vasitəsi ilə N-depropilpropafenon (norpropafenon) əmələ gəlir. Pasiyentlərin 10 %-dən azında propafenonun metabolizmi ləng gedir, çünki onlarda, 5-hidroksipropafenon əmələ gəlmir və ya yalnız əhəmiyyət kəsb etməyən miqdarda əmələ gəlir (yəni, ləng metabolizatorlar). Eliminasiyası Sürətli metabolizatorlarda preparatın yarımxaricolma dövrü 2-10 saat arasında dəyişir, ləng metabolizatorlarda isə 10 saatdan 32 saata qədər dəyişir. Propafenonun klirensi 0,67–0,81 l/saat/kq təşkil edir. Xəttilik/qeyri-xəttilik Sürətli metabolizatorlarda doyan hidroksilləşmənin (CYP2D6) təsiri ilə preparatın farmakokinetikası qeyri-xəttidir, ləng metabolizatorlarda isə farmakokinetika xəttidir. Bütün pasiyentlərdə tarazlıq vəziyyəti 3-4 gündən sonra əldə olunur və bu səbəbdən, bütün pasiyentlər üçün preparatın tövsiyə olunan dozaları, onların metabolik statuslarından asılı olmayaraq (sürətli metabolizatorlarla müqayisədə, ləng metabolizatorlar), eynidir. Subyektlərin inter-/intra-dəyişkənliyi Propafenonun farmakokinetikasında əhəmiyyətli fərdi dəyişkənlik əsasən, qaraciyərdən ilk keçid effekti və sürətli metabolizatorlarda qeyri-xətti farmakokinetika ilə əlaqəlidir. Qanda dərman preparatının yüksək dəyişkənlik dərəcəsini nəzərə alaraq, ehtimal edilən klinik və elektrokardioqrafik toksiklik əlamətlərinə xüsusi diqqət yetirərək, preparatın dozasını dəqiq titrləmək lazımdır. Xüsusi pasiyent qrupları Yaşlı pasiyentlər Propafenonun normal böyrək funksiyalarına malik yaşlı pasiyentlərə təsiri çox dəyişkən olmuşdur və sağlam gənc yaşlı şəxslərdən çox fəqlənməmişdir. 5-hidroksipropafenonun təsiri analoji olmuşdur, lakin qlükuronid propafenonun təsiri 2 dəfə yüksək olmuşdur. Pediatrik populyasiya Yaşı 3 gündən 7,5 yaşa qədər uşaqlarda preparatın venadaxili və oral istifadəsindən sonra, propafenonun klirensi (zahiri) aşkar yaş asılılığı qeyd olunmadan, 0,13 l/saat/kq-dan 2,98 l/saat/kq-a qədər dəyişir. Yaşı 1 gündən 10,3 yaşa qədər olan 47 uşaqda (orta göstərici 2,2 ay) tarazlıq vəziyyətində preparatın konsentrasiyaları, propafenonun standartlaşdırılmış dozalarının peroral yolla istifadəsindən sonra, 1 yaşdan kiçik uşaqlarla müqayisədə, 1 yaşdan yuxarı uşaqlarda 45 % yüksək olmuşdur. Müxtəlif subyektlər arasında böyük fərqlərin mövcudluğuna baxmayaraq, dozanın müəyyən edilməsi üçün qan plazmasında propafenonun konsentrasiyalarının təyin edilməsinə nisbətən, EKQ monitorinqin aparılması daha məqsədəuyğundur. Böyrək funksiyalarının pozulması Propafenonun və 5-hidroksipropafenonun böyrək funksiyalarının pozulmasından əziyyət çəkən pasiyentlərə təsiri sağlam şəxslərə təsiri ilə analoji olmuşdur, lakin, birincilərdə qlükuronid metabolitlərin toplanması müşahidə olunmuşdur. Böyrək funksiyalarının pozulmasından əziyyət çəkən pasiyentlərdə propafenonu ehtiyatla istifadə etmək lazımdır. Qaraciyər funksiyalarının pozulması Qaraciyər funksiyalarının pozulmasından əziyyət çəkən pasiyentlərdə propafenon yüksək peroral biomənimsənilmə və uzunmüddətli yarımxaricolma dövrü nümayiş etdirir. Belə pasiyentlərdə preparatın dozasını korreksiya etmək lazımdır.

İstifadəsinə göstərişlər

Klinik simptomatika ilə müşayiət olunan və müalicənin aparılmasını tələb edən supraventrikulyar aritmiyalar: – atrioventrikulyar düyün taxikardiyası; – Volf-Parkinson-Vayt sindromu (WPW-sindrom); – qulaqcıqların paroksizmal fibrillyasiyası sindromu. Ağır mədəcik taxiaritmiyası – həkim tərəfindən göstərilən vəziyyət həyat üçün təhlükəli kimi qiymətləndirildiyi hallarda. Preparat, böyüklərin və 18 yaşdan yuxarı yeniyetmələrin müalicəsi üçün nəzərdə tutulmuşdur.

Əks göstərişlər

Preparatın istənilən komponentinə qarşı yüksək həssaslıq. Miokardın ifadəolunmuş struktur xəstəlikləri: son 3 ay ərzində miokard infarktı; sol mədəciyin 35%-dən az atma fraksiyası ilə nəzarət edilməyən durğun ürək çatışmazlığı; aritmiya ilə törədilən şok müstəsna olmaqla, kardiogen şok; ağır simptomatik bradikardiya; kəskin obstruktiv ağciyər xəstəliyi sinus düyünün zəifliyi sindromu, sinoatrial blokada, II və daha yüksək dərəcəli atrioventrikulyar blokada, His dəstəsinin ayaqcıqlarının blokadası və ya kardiostimulyator olmadıqda, intraventrikulyar blokada. Ağır hipotenziya. Anamnezdə Bruqad sindromu. Elektrolitlərin manifest dizbalansı (məsələn, kalium metabolizminin pozulması). Miasteniya qravis. Ritonavirlə eyni vaxtda müalicə. Uşaqlar və 18 yaşdan yuxarı yeniyetmələr.

Xüsusi göstərişlər və ehtiyat tədbirləri

Preparatın ehtimal edilən proaritmogen təsirini nəzərə alaraq, propafenonun istifadəsi ilə müalicəni yalnız həkim təyinatı əsasında və onun nəzarəti altında aparmaq tövsiyə olunur. Müalicə kursu müddətində, xüsusilə, müalicənin əvvəlində EKQ-monitorinq aparmaq, elektrolit balansa (xüsusilə, kaliumun konsentrasiyasına) nəzarət etmək və vaxtaşırı “qaraciyər” transaminazalarının aktivliyini müəyyən etmək lazımdır. Paroksizmal səyriyən aritmiyanın müalicəsi zamanı qulaqcıqların səyriməsindən qulaqcıqların titrəməsinə keçid meydana çıxa bilər və bu, mədəciklərin yığılma tezliyinin həddindən artıq yüksəlməsi ilə (yəni, dəqiqədə > 180 vurğu) 2:1-ə və ya 1:1-ə nisbətlə mədəciklərə ötürülə bilər. IC sinfinə daxil olan aritmiyaəleyhinə digər preparatların istifadəsi zamanı olduğu kimi, miokardın ağır struktur xəstəliklərindən əziyyət çəkən pasiyentlər ciddi əlavə təsirlərin meydana çıxmasına daha çox meyllidirlər. Belə pasiyentlərdə propafenonun istifadəsi əks göstərişdir. Antikoaqulyantlarla və hipoqlikemik preparatlarla uzunmüddətli müalicə qəbul edən pasiyentlərin hərtərəfli klinik və laborator müşahidəsini aparmaq vacibdir. Propafenonun istifadəsi Bruqada sindromunun simptomsuz gedişini aşkar edə bilər və EKQ-də bruqadayabənzər dəyişikliklərin meydana çıxmasına səbəb ola bilər. Bu səbəbdən, preparatın istifadəsi ilə müalicəyə başladıqdan sonra, Bruqada sindromunu və EKQ-də bruqadayabənzər dəyişiklikləri istisna etmək məqsədi ilə, pasiyentin elektrokardioloji müayinəsini aparmaq lazımdır. Müalicə müddətində sinoatrial blokada və ya II-III dərəcəli atrioventrikulyar blokada və ya tez- tez təkrar olunan ekstrasistoliya meydana çıxdığı halda, müalicəni dayandırmaq lazımdır. Preparatın beta-blokatorlarla analoji təsirə malik olduğunu nəzərə alaraq, astmadan əziyyət çəkən pasiyentlərin müalicəsi aparıldıqda, ehtiyat tədbirlərinə riayət etmək lazımdır. Pasiyent (hətta, kiçik cərrahiyyə əməliyyatından əvvəl belə), Propanorm preparatının istifadəsi barədə diş həkimini və ya cərrahı məlumatlandırmalıdır. Doza həddinin aşılması baş verdikdə və ya azyaşlıların preparatı təsadüfən daxilə qəbul etdiyi halda, dərhal həkimə müraciət etmək lazımdır. Preparatın 1 örtüklü tabletinin tərkibində təsiredici maddənin yüksək miqdarını nəzərə alaraq, preparatın 18 yaşa qədər uşaqlar tərəfindən istifadəsi tövsiyə edilmir.

Digər dərman vasitələri ilə qarşılıqlı təsiri

Propanorm preparatını digər dərman preparatları ilə birlikdə istifadə etdikdə, həmin preparatlar arasında qarşılıqlı təsirlərin meydana çıxması ehtimal edilir. Göstərilən faktı nəzərə alaraq, hazırda istifadə edilən və ya istifadəsi nəzərdə tutulan bütün dərman preparatları barədə həkimi məlumatlandırmaq vacibdir – bu, həm həkim resepti əsasında, həm də reseptsiz buraxılan dərman preparatlarına eyni dərəcədə aiddir. Propanorm preparatı ilə eyni zamanda sərbəst satışda olan istənilən dərman preparatının istifadəsinə başlamazdan əvvəl, həkimlə məsləhətləşmək vacibdir. Məsələn, propafenonun və yerli anestetiklərin (məsələn, elektrokardiostimulyatorların implantasiyası zamanı və ya cərrahi müdaxilələr və stomatoloji proseduralar zamanı) və ürək yığılmalarının tezliyinə və/və ya miokardın yığılma qabiliyyətinə inhibəedici təsir göstərən digər dərman preparatlarının (məsələn, beta-blokatorların, trisiklik antidepressantların) istifadəsi ilə kombinəolunmuş müalicə aparıldıqda, əlavə effektlərin şiddətlənməsi müşahidə oluna bilər. Fenobarbitalın (yuxu pozğunluqlarının və qıcolma ilə müşayiət olunan vəziyyətlərin müalicəsi üçün istifadə olunan dərman preparatı) və ya antibiotik olan rifampisinin eyni zamanda istifadəsi, Propanorm preparatının təsir effektinin aşağı düşməsinə səbəb olur. Öz növbəsində, Propanorm preparatı qan laxtalanması əleyhinə dərman preparatlarının (antikoaqulyantların, məsələn, fenprokumonun, varfarinin) plazma konsentrasiyalarını və protrombin müddətini artıra bilir və bu səbəbdən, göstərilən dərman preparatlarını qeyd olunan kombinasiyada qəbul edən pasiyentlərdə qanın laxtalanma qabiliyyətinin hərtərəfli monitorinqinin aparılması tövsiyə olunur. Zərurət yarandığı halda, dozalanmanın korreksiyasını həyata keçirmək lazımdır. Propanorm preparatının diqoksinlə (ürək çatışmazlığının müalicəsi üçün istifadə olunan preparat) eyni zamanda istifadəsi, qanda diqoksinin səviyyəsinin yüksəlməsinə və onun istifadəsi ilə əlaqəli əlavə reaksiyalar təzahürlərinin tezliyinin yüksəlməsinə gətirib çıxarır. CYP2D6, CYP1A2, CYP3A4 izofermentləri inhibə edən preparatlar, məsələn, ketokonazol, simetidin və xinidin, eritromisin və qreypfrut şirəsi qanda propafenonun səviyyəsinin yüksəlməsinə səbəb ola bilərlər. Propafenon göstərilən izofermentlərin inhibitorları ilə eyni zamanda istifadə edildiyi halda, pasiyentləri ciddi müşahidə altında saxlamaq və zərurət yarandıqda, dozalanmanın korreksiyasını aparmaq lazımdır. Propafenonun CYP2D6 izoferment vasitəsi ilə metabolizmə məruz qalan dərman preparatları ilə (məsələn, venlafaksinlə) eyni zamanda istifadəsi, həmin dərman preparatlarının səviyyəsinin yüksəlməsinə gətirib çıxara bilər. Propafenonla aparılan müalicə müddətində plazmada və ya qanda propranololun, metoprololun, dezipraminin, siklosporinin, teofillinin konsentrasiyalarının yüksəlməsi qeyd olunmuşdur. Doza həddinin aşılmasının əlamətləri meydana çıxdıqda, göstərilən dərman preparatlarının dozalarını aşağı salmaq lazımdır. Propafenonu və lidokaini eyni zamanda istifadə etdikdə, göstərilən dərman preparatlarının farmakokinetikasına hər hansı əhəmiyyətli təsir müşahidə olunmamışdır. Bununla belə, propafenonu və venadaxili lidokaini eyni zamanda istifadə etdikdə, lidokainin təsiri altında mərkəzi sinir sisteminə əlavə təsirlər riskinin yüksəlməsi müşahidə olunmuşdur. Amiodaronun propafenonla kombinəolunmuş müalicəsi keçiriciliyə və repolyarizasiyaya təsir göstərə bilər və potensial proaritmik qeyri-normallıqlarla müşayiət oluna bilər. Belə halda, terapevtik effektdən asılı olaraq,hər iki preparatın dozalanmasının korreksiyasını aparmaq lazımdır. Propafenonu serotoninin geri tutulmasının selektiv inhibitorları (SGTSİ) ilə, məsələn, paroksetinlə və fluoksetinlə eyni zamanda istifadə etdikdə, qan plazmasında propafenonun səviyyəsi yüksələ bilər. Artan plazma konsentrasiyası potensialına götə ritonavir və propafenon birgə tətbiq olunmamalıdır.

Hamiləlik və laktasiya dövründə istifadəsi

Hamiləlik dövrü Propafenon plasentar baryerdən keçir. Göbək ciyəsindəki propafenonun konsentrasiyasının ana qanındakı miqdarının təxminən 30%-i olduğu bildirilmişdir.Hamilə qadınların iştirakı ilə müvafiq və ciddi nəzarətli tədqiqatlar aparılmamışdır. Hamiləlik dövründə propafenonu yalnız, həyati göstərişlər əsasında, ana üçün potensial fayda döl üçün potensial riskdən üstün olduğu halda istifadə etmək olar. Laktasiya dövrü Propafenonun ana südünə daxil olub-olmamasının öyrənilməsi istiqamətində heç bir tədqiqat aparılmamışdır. Məhdud məlumatlar göstərir ki, qeyd olunan maddənin ana südünə nüfuz etməsi mümkündür. Preparatın istifadəsi barədə qərar həkim tərəfindən, ana üçün müalicənin üstünlükləri və uşaq üçün ehtimal edilən riskləri qiymətləndirdikdən sonra, qəbul edilməlidir. Nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri Preparatın istifadəsi nəticəsində qeyri-aydın (dumanlı) görmə, başgicəllənmə, yorğunluq və postural hipotenziya meydana çıxa bilər və bu, pasiyentin reaksiya sürətinə təsir göstərərək, nəqliyyat vasitəsini və ya digər potensial təhlükəli mexanizmləri idarəetmə qabiliyyətinin aşağı düşməsinə səbəb ola bilər.

İstifadə qaydası və dozası

Preparatın dozalanması fərdidir, həkim tərəfindən təyin olunur və onun daimi nəzarəti altında saxlanılır. Pasiyentlərdə QRS kompleksinin əhəmiyyəli genişlənməsi və ya II və III dərəcəli atrioventrikulyar blokada meydana çıxdığı halda, preparatın dozasının aşağı salınmasını nəzərdən keçirmək vacibdir. Preparatın fərdi dəstəkləyici dozası EKQ monitorinqi və arterial təzyiqin təkrar nəzarətini əhatə edən kardioloji müşahidə altında (dozanın titrlənməsi mərhələsində) müəyyən edilir. Propafenonu bədən kütləsi təxminən 70 kq olan pasiyentlərdə peroral yolla istifadə etdikdə, müalicəni hər 8 saatdan bir sutkada 3 dəfə birdəfəlik 150 mq dozadan başlamaq tövsiyə olunur. Zərurət yarandığı halda, preparatın dozasını sutkada 2 dəfə 300 mq-a qədər artırmaq lazımdır. Maksimal doza sutkada 3 dəfə 300 mq təşkil edir. Dozanın artırılmasını 3-4 günlük fasilələrlə həyata keçirmək lazımdır. Daha aşağı bədən kütləsinə malik pasiyentlər üçün sutkalıq dozanın müvafiq aşağı salınması tələb olunur. Yaşlı pasiyentlər Yaşlı pasiyentlərdə və sol mədəcik funksiyalarının əhəmiyyətli pozğunluqları (sol mədəcik atım fraksiyası 35 %-dən aşağı) və ya miokardın struktur pozğunluqları qeyd olunan pasiyentlərdə müalicəni, tədricən, xüsusi ehtiyatla başlamaq və preparatın dozalarını çox ləng artırmaq vacibdir. Eyni göstərişləri dəstəkləyici müalicəyə də aid etmək olar. Dozanın istənilən zəruri artırılmasını 5-8 gün müddətində aparılan müalicədən tez aparmaq olmaz. Qaraciyər və ya böyrək funksiyalarının pozulmasından əziyyət çəkən pasiyentlər Qaraciyər və böyrək patologiyası qeyd olunan pasiyentlərə propafenonu ehtiyatla təyin etmək lazımdır. Qaraciyər funksiyalarının pozulmasından əziyyət çəkən pasiyentlərdə, hətta adi terapevtik dozalardan istifadə etdikdə belə, təsiredici maddənin orqanizmdə kumulyasiyası (toplanması) baş verə bilər. Həmin pasiyentlərdə propafenonun dozasının titrlənməsi EKQ monitorinqi və qan plazmasında propafenonun konsentrasiyalarının ciddi nəzarəti altında aparılmalıdır. Tabletləri bütöv və az miqdar su ilə birlikdə daxilə qəbul etmək lazımdır. Preparat yeməkdən sonra istifadə edilməlidir.

Əlavə təsirləri

Ümumi təhlükəsizlik profili Propafenonla terapiya zamanı daha geniş yayılmış və çox tez-tez qeyd edilən əlavə təsirlər başgicəllənmə, ürək keçiriciliyinin və palpitasiyanın pozulmasıdır. Əlavə təsirlərin tezliyi aşağıdakı parametrlərlə təyin edilir: çox tez-tez (≥ 1/10); tez-tez (≥ 1/100 – < 1/10); bəzən (≥ 1/1000 – < 1/100); nadir hallarda (≥ 1/10000 – < 1/1000); çox nadir hallarda (< 1/10000); məlum deyil (əldə olan məlumatlar görə tezliyi qiymətləndirmək mümkün deyil). Qan və limfatik sistemdə baş verən pozuntular Bəzən: trombositopeniya. Məlum deyil: aqranulositoz, leykopeniya, qranulositopeniya. İmmun sistemdə baş verən pozuntular Məlum deyil: yüksək həssaslıq reaksiyaları. Maddələr mübadiləsində baş verən pozuntular Bəzən: iştahanın azalması. Psixiatrik pozğunluqlar Tez-tez: həyəcan-narahatlıq, yuxunun pozulması. Bəzən: qorxulu yuxular. Məlum deyil: şüurun dumanlanması. Sinir sistemində baş verən pozuntular Çox tez-tez: başgicəllənmə. Tez-tez: dadbilmənin itməsi, başağrı. Bəzən: bayılma, ataksiya, paresteziya. Məlum deyil: qıcolma, ekstrapiramidal simptomlar, narahatlıq. Görmə orqanında baş verən pozuntular Tez-tez: qeyri-aydın (dumanlı) görmə. Eşitmə orqanında və vestibulyar sistemdə başverən pozuntular Bəzən: vertiqo. Ürəkdə baş verən pozuntular Çox tez-tez: keçiriciliyin artması (sinoatrial, atrioventrikulyar və ya mədəcikdaxili blokada), ürəkdöyünmə. Tez-tez: bradikardiya, sinus bradikardiyası, taxikardiya, qulaqcıq səyriməsi. Bəzən: mədəcik taxikardiya, aritmiya (nəbzin sürətlənməsi (taxikardiya) və ya mədəciklərin fibrilyasıyası ilə təzahür edən aritmogen təsir, aritmiya potensial letal ola bilər). Məlum deyil: fibrilyasiya, ürək çatışmazlığı (mövcud olan ürək çatışmazlığının dekompensasiyası daxil olmaqla), bradiaritmiya. Damarlarda baş verən pozuntular Bəzən: hipotenziya. Məlum deyil: ortostatik hipotenziya. Tənəffüs sistemində, döş qəfəsi və divararalığı orqanlarında baş verən pozuntular Tez-tez: tənəffüsün pozulması (təngnəfəslik). Mədə-bağırsaq pozuntuları Tez-tez: qarın nahiyəsində ağrı, ürəkbulanma, diareya, qəbizlik, ağızda quruluq. Bəzən: qarında köp, meteorizm. Məlum deyil: mədə-bağırsaq pozulmaları. Qaraciyərdə və ödçıxarıcı yollarda baş verən pozuntular Tez-tez: qaraciyər funksiyasının pozulması (qanda aspartataminotransferazanın, alaninaminotransferazanın, qammaqlutamiltransferazanın və qələvi fosfatazanın səviyyəsinin artması). Məlum deyil: xolestaz, sarılıq, hepatit, qaraciyər hüceyrələrinin zədələnməsi (hepatonekroz). Dəridə və dərialtı toxumada baş verən pozuntular Bəzən: övrə, qaşınma, səpgi, eritema. Əzələ, skelet və birləşdirici toxumada baş verən pozuntular Məlum deyil: qırmızı qurdeşənəyini xatırladan sindrom (lyupus sindromu). Reproduktiv sistemdə və süd vəzilərində baş verən pozuntular Bəzən: erektil disfunksiya. Məlum deyil: spermatogenezin pozulması (müalicə dayandırıldıqdan sonra geridönəndir). Ümumi və yeridilmə nahiyəsində baş verən pozuntular Tez-tez: sinədə ağrı, asteniya, yüksək yorğunluq, hipertermiya. Əlavə təsirlər, o cümlədən, təlimatda qeyd edilməyən, yarandıqda həkimə müraciət etmək lazımdır.

Doza həddinin aşılması

Propafenonla doza həddinin aşılması aşağıdakı simptomlarla təzahür edə bilər: ● Ürək simptomları Propafenonun ürəyə toksik effekti QT intervalının uzanması, QRS kompleksinin yayılması, sinus düyününün avtomatizminin zəifləməsi, atrioventrikulyar blokada, mədəcik taxikardiyası, mdəciklərin və qulaqcıqların fibrilyasiyası kimi oyanıqlığın və keçiriciliyin pozulması ilə təzahür edir. Bundan başqa ürəyin yığılma qabiliyyətinin azalması (mənfi inotrop effekt) arterial hipotenziyanın və kardial şokun inkişafına səbəb olur. ● Ekstrakardial simptomlar Tez-tez-başağrı, başgicəllənmə, görmənin pozulması, paresteziya, tremor, ürəkbulanma, qəbizlik və ağızda quruluq. Ağır intoksikasiya zamanı klonik və tonik qıcolma, paresteziya, yuxululuq, koma, tənəffüsün dayanması inkişaf edə bilər. Müalicəsi İntensiv terapiya çərçivəsində ümumi təxirəsalınmaz tibbi yardım tədbirlərin aparılmasından başqa pasiyentin həyati vacib göstəricilərinin monitorinqi aparılmalıdır və ehtiyac olduqda, onlar korreksiya olunmalıdır. Defibrilyasiya, eləcə də, dopaminin və izoproterenolun infuziyası ürək ritminə və arterial təzyiqə nəzarət zamanı effektiv olmuşdur. Diazepamın venadaxili yeridilməsindən sonra qıcolma azalmışdır. Tənəffüsün mexaniki dəstəklənməsi və ürəyin xarici masajı kimi ümumi köməkçi tədbirlərə ehtiyac ola bilər. Dərman vasitəsinin orqanizmdən hemoperfuziyanın köməyilə xaric edilməsi cəhdi az effektivdir. Propafenonun qan plazmasının zülallarla yüksək dərəcədə birləşməsi (> 95%) və geniş həcmdə paylanması səbəbinə görə hemodializ az effektivdir.

Buraxılış forması

150 mq və ya 300 mq-lıq örtüklü tabletlər. 10 tablet, blisterdə. 5 blister, içlik vərəqə ilə birlikdə karton qutuya qablaşdırılır.

Saxlanma şəraiti

25ºС temperaturdan yüksək olmayan, orijinal qutusunda və uşaqların əli çatmayan yerdə saxlamaq lazımdır.

Yararlılıq müddəti

5 il. Yararlılıq müddəti bitdikdən sonra istifadə etmək olmaz.

Aptekdən buraxılma şərti

Resept əsasında buraxılır.

İstehsalçı

“Promed” CS Praqa a.o. Telçska 377/1, Mixle, 140 00 Praqa 4, Çex Respublikası.