Streptosid 300 mq N10 tablet Arterium

Dərman vasitəsinin istifadəsi üzrə təlimat (xəstələr üçün)

STREPTOSİD tabletlər

Tərkibi

Təsiredici maddə: 1 tabletin tərkibində 100 % maddə hesabı ilə 300 mq sulfanilamid vardır. Köməkçi maddələr: kartof nişastası, talk, natrium kroskarmelloza, metilsellüloza.

Təsviri

Yastı səthli, xətli və iti qıraqlı, ağ və ya sarımtıl-ağ rəngli tabletlər. Tabletlərin üzərində mərmərə bənzərliliyin mövcudluğu yolveriləndir.

Farmakoterapevtik qrupu

Sistem istifadə üçün mikrob əleyhinə preparatlar. Sistem istifadə üçün antibakterial preparatlar. Qısamüddətli təsir göstərən sulfanilamidlər. Sulfanilamid. ATC kodu: J01EB06.

Farmakoloji xüsusiyyətləri

Farmakodinamikası Streptosid mikroorqanizmlərin daxilində “böyümə faktorları adlandırılan” və molekullarının tərkibində paraaminobenzoy turşusu (PABT) saxlayan fol turşusu, dehidrofol turşusu və digər birləşmələrin formalaşmasına pozucu təsir göstərir. PABT-ın və sulfanilamidin quruluşlarının oxşar olmasını nəzərə alaraq, sulfanilamid turşusunun rəqabətli antaqonisti kimi mikroorqanizmlərin metabolik zəncirinə daxil olur və burada mübadilə proseslərini pozur ki, bu da bakteriostatik effektin meydana çıxmasına səbəb olur. Sulfanilamidlər qrammüsbət və qrammənfi mikroorqanizmlərin əksəriyyətinə qarşı geniş təsir spektrinə malik olan sintetik bakteriostatik antibiotiklərdir, lakin, ayrı-ayrı mikroorqanizm növlərinin bir çox ştamları onların təsirinə qarşı davamlı ola bilər. Farmakokinetikası Daxilə qəbul edildikdə, preparat sürətlə sorulur. Streptosidin qanda maksimal konsentrasiyası 1-2 saatdan sonra müəyyən olunur (4 saat çərçivəsində preparat onurğa beyin mayesində qeyd olunur); qanda maksimal konsentrasiyasının 50 % azalması 8 saatdan az müddət ərzində baş verir. Preparatın təxminən 95 %-i böyrəklər vasitəsi ilə orqanizmdən xaric olunur.

İstifadəsinə göstərişlər

Preparata qarşı həssas mikroorqanizmlərin törətdikləri infeksion-iltihabi xəstəliklər: dərinin və selikli qişaların infeksion xəstəlikləri (yaralar, xoralar, yataq yaraları), enterokolit, pielit, sistit.

Əks göstərişlər

– Sulfanilamidlərə, sulfonlara və preparatın tərkibinə daxil olan komponentlərdən hər hansı birinə qarşı yüksək həssaslıq; anamnezdə sulfanilamidlərə qarşı ağır dərəcəli toksik-allergik reaksiyaların qeyd olunması; – nefrozlar, nefritlər; – bazedov xəstəliyi; – kəskin hepatitlər; – sümük iliyində qanyaranma prosesinin tormozlanması; – böyrək və/və ya qaraciyər çatışmazlığı; – dekompensasiya olunmuş xroniki ürək çatışmazlığı; – qlükoza-6-fosfatdehidrogenaza fermentinin çatışmazlığı, porfiriya; – hamiləlik və ya laktasiya dövrü.

Xüsusi göstərişlər və ehtiyat tədbirləri

Preparatın istifadəsi ilə müalicə müddətində böyrək funksiyalarına və periferik qan göstəricilərinə, qanda qlükoza səviyyəsinə sistematik nəzarətin həyata keçirilməsi tələb olunur. Preparatın istifadəsi ilə uzunmüddətli müalicə aparıldıqda, vaxtaşırı qan analizi (qanın biokimyəvi və ümumi analizləri) aparılmalıdır. Preparatın yetərli olmayan dozalarda təyin edilməsi və ya preparatın istifadəsinin vaxtından əvvəl dayandırılması mikroorqanizmlərin sulfanilamidlərin təsirinə qarşı davamlılığının yüksəlməsinə səbəb ola bilər. Sulfanilamidləri A qrupuna daxil olan beta-hemolitik streptokokların törətdikləri infeksiyaların müalicəsi üçün istifadə etmək olmaz, çünki, sulfanilamidlər onların eradikasiyasına gətirib çıxara bilmir və deməli, revmatizm və qlomerulonefrit kimi ağırlaşmaların qarşısını ala bilmir. Xroniki ürək çatışmazlığından və qaraciyər xəstəliklərindən əziyyət çəkən pasiyentlərdə və eləcə də, böyrək funksiyalarının pozulması müşahidə olunan pasiyentlərdə preparatı ehtiyatla istifadə etmək lazımdır. Allergik xəstəliklərin ağır formaları və ya bronxial astma və qan sisteminin xəstəlikləri qeyd olunan pasiyentlərə Streptosid preparatı ehtiyatla təyin edilməlidir. Sulfanilamidlərin qanda şəkərin səviyyəsinə təsir göstərə bilməsini nəzərə alaraq, şəkərli diabetdən əziyyət çəkən pasiyentlərdə sulfanilamidlər, o cümlədən, Streptosid preparatı ehtiyatla istifadə edilməlidir. Sulfanilamid preparatlarının yüksək dozaları hipoqlikemik təsir nümayiş etdirir. Sulfanilamidlərin bakterisid preparat deyil, bakteriostatik preparat olmasını nəzərə alaraq, infeksiyanın residivləşməsinin və mikroorqanizmlərin davamlı formalarının inkişaf etməsinin qarşısını almaq məqsədi ilə tamdəyərli müalicə kursu həyata keçirilməlidir. Kristaluriyanın və urolitiazın inkişaf etməsinin qarşısını almaq məqsədi ilə pasiyentlər kifayət qədər maye qəbul etməlidirlər. Ağır dərəcəli əlavə reaksiyaların meydana çıxma riskinin yüksəlməsi ehtimalını nəzərə alaraq, yaşı 65- dən yuxarı olan pasiyentlərə preparatın təyin edilməsindən qaçınmaq lazımdır. Sulfanilamid preparatların istifadəsi müddətində fotosensibilizasiyanın inkişaf etməsi ehtimal olunur və bu səbəbdən, pasiyentlərə birbaşa günəş şüalarının və süni ultrabənövşəyi şüalanmanın təsirindən qorunmaq tövsiyə olunur. Müalicə müddətində dozalanma rejiminə riayət etmək və preparatın istifadəsi ötürülmədən tövsiyə olunan dozanı 24 saatlıq intervalla qəbul etmək tələb olunur. Preparatın 1 dozasının istifadəsi ötürüldüyü halda, növbəti dozanı ikiqat artırmaq olmaz.

Digər dərman vasitələri ilə qarşılıqlı təsiri

Qeyri-steroid iltihab əleyhinə preparatlar, sulfonilkarbamid törəmələri, antitrombotik preparatlar, K vitamininin antaqonistləri ilə eyni zamanda istifadə edildikdə, göstərilən preparatların təsiri güclənir. Fol turşusu və bakterisid antibibiotiklərin (o cümlədən, penisillinlərin, sefalosporinlərin) eyni zamanda istifadəsi, sulfanilamidlərin effektivliyinin zəifləməsinə səbəb olur. Bakterisid antibiotiklər və peroral kontraseptivlərlə eyni zamanda istifadə edildikdə, göstərilən preparatların təsirinin zəifləməsinə gətirib çıxarır. PABT və barbituratlar sulfanilamid preparatlarının aktivliyinin güclənməsinə səbəb olur. Eritromisin, linkomisin, tetrasiklin – antibakterial aktivliyin qarşılıqlı güclənməsi, təsir spektrinin genişlənməsi müşahidə olunur. Rifampisin, streptomisin, monomisin, kanamisin, gentamisin, oksixinolin törəmələri (nitroksolin) kimi birləşmələrlə eyni zamanda istifadə edildikdə, preparatların antibakterial təsiri dəyişmir. Nalidiks turşusu ilə eyni zamanda istifadəsi müddətində bəzi hallarda antaqonizm müşahidə olunur. Xloramfenikol, nitrofuranlar – ümumi effekt zəifləyir. Tərkibində PABT efirləri olan preparatlar (novokain, anestezin, dikain) sulfanilamidlərin antibakterial aktivliyini inaktivləşdirir. Sulfanilamidləri aşağıda göstərilən preparatlarla eyni zamanda təyin etmək olmaz: heksametilentetramin (urotropin), diabet əleyhinə preparatlar (sulfonilkarbamid törəmələri), difenin, neodikumarin və digər dolayı təsirli antikoaqulyantlar.

Hamiləlik və laktasiya dövründə istifadəsi

Hamiləlik dövründə Streptosid preparatının istifadəsi əks göstərişdir. Sulfanilamidlər ana südünə əhəmiyyət kəsb etməyən miqdarlarda nüfuz edir və bu səbəbdən, preparatın istifadəsi müddətində ana südü ilə qidalanma əks göstərişdir. Nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri Preparatın nəqliyyat vasitəsini və ya digər potensial təhlükəli mexanizmləri idarəetmə qabiliyyətinə təsiri barədə heç bir məlumat yoxdur. Sulfanilamidlərin istifadəsi ilə müalicə müddətində sinir sistemi ilə əlaqəli başgicəllənmə, qıcolmalar, ataksiya, yuxuya meyllilik, depressiya, psixozlar kimi əlavə reaksiyaların meydana çıxma ehtimalını nəzərə alaraq, preparatın istifadəsinə qarşı pasiyentin fərdi reaksiyası müəyyən edilənə qədər nəqliyyat vasitəsini və ya digər potensial təhlükəli mexanizmləri idarə etməkdən çəkinmək tövsiyə olunur.

İstifadə qaydası və dozası

Preparat qida qəbulu zamanı və ya yeməkdən sonra 150-200 ml su ilə birlikdə daxilə qəbul edilməlidir. Böyüklərdə və 12 yaşdan yuxarı uşaqlarda preparatın birdəfəlik dozası 600 mq – 1,2 q, sutkalıq dozası – 3-6 q təşkil edir. Sutkalıq doza 5 dəfəlik istifadəyə bölünməlidir. Preparatın böyüklərdə maksimal dozaları: birdəfəlik – 2 q, sutkalıq – 7 q təşkil edir. Preparatın birdəfəlik dozası 3 yaşdan 6 yaşa qədər uşaqlarda – 300 mq, 6 yaşdan 12 yaşa qədər uşaqlarda – 300-600 mq. Uşaqlarda preparatın istifadə tezliyi sutkada 4-6 dəfə təşkil edir. Uşaqlarda preparatın maksimal sutkalıq dozası – 0,9-2,4 q. Müalicənin davametmə müddəti xəstəliyin ağırlıq dərəcəsindən və gedişindən, prosesin lokalizasiyasından və müalicənin effektivliyindən asılı olaraq, həkim tərəfindən fərdi qaydada müəyyən edilir. Uşaqlar Preparat 3 yaşdan yuxarı uşaqlarda istifadə edilə bilər.

Əlavə təsirləri

Qan və limfa sistemində baş verən pozğunluqlar: leykopeniya, aqranulositoz, aplastik anemiya, trombositopeniya, hipoprotrombinemiya, eozinofiliya, qlükoza-6-fosfatdehidrogenaza ferment çatışmazlığı zamanı hemolitik anemiya. Ürək-damar sistemində baş verən pozğunluqlar: taxikardiya, miokardit. Sinir sistemində baş verən pozğunluqlar: baş ağrısı, aseptik meningit, ataksiya, xoşxassəli kəllədaxili hipertenziya, qıcolmalar, başgicəllənmə, yuxuya meyllilik/yuxusuzluq, yorğunluq hissi, depressiya da daxil olmaqla, nevroloji reaksiyalar, periferik və ya optik neyropatiyalar, psixoz, tormozlanma vəziyyəti, parestziyalar. Tənəffüs sistemində baş verən pozğunluqlar: ağciyər infiltratları, fibrozlaşan alveolit. Mədə-bağırsaq sistemində baş verən pozğunluqlar: susuzluq hissi, ağızda quruluq, dispepsiya təzahürləri, ürəkbulanma, qusma, diareya, anoreksiya, pankreatit, psevdomembranoz kolit. Hepatobiliar sistemdə baş verən pozğunluqlar: qaraciyər fermentlərinin (ALT (alaninaminotransferaza), AST (aspartataminotransferaza), qələvi fosfataza) aktivliyinin yüksəlməsi, xolestatik hepatit, hepatonekroz, hepatomeqaliya, sarılıq, xolestaz. Sidik-ifrazat sistemində baş verən pozğunluqlar: sidiyin rənginin dəyişməsi (dolğun sarı-qonur rəng), sidiyin turş reaksiyası qeyd olunduqda, kristaluriya; aşağıda göstərilən nefrotoksik reaskiyaların meydana çıxması ehtimal edilir – interstisial nefrit, tubulyar nekroz, böyrək çatışmazlığı, hematuriya, anuriya ilə müşayiət olunan böyrək şoku. Dəridə və dərialtı toxumalarda baş verən pozğunluqlar: dərinin hiperemiyası, dəri üzərində səpgilər (o cümlədən, eritematoz-skvamoz, papulyoz səpgilər), qaşınma, övrə, allergik dermatit, fotosensibilizasiya, eksfoliativ dermatit, düyünlü eritema, sianoz. Allergik reaksiyalar: toksik epidermal nekroliz (Layell sindromu), Stivens-Conson sindromu, sistem qırmızı qurd eşənəyi, zərdab sindromu, anafilaktik reaksiyalar, Kvinke ödemi, zökəm. Ümumi pozğunluqlar: dərman preparatının istifadəsi ilə əlaqəli qızdırma, sağ qabırğaaltı nahiyədə və bel nahiyəsində ağrı. Digər dəyişikliklər: tənəffüsün çətinləşməsi, düyünlü periarteriit, hipotireoz, hipoqlikemiya.

Doza həddinin aşılması

Əlavə reaksiyalar təzahürlərinin güclənməsi müşühidə oluna bilər. Doza həddinin aşılması baş verdiyi halda, anoreksiya (iştahanın olmaması), ürəkbulanma, qusma, sancıyabənzər ağrı, baş ağrısı, yuxuya meyllilik, başgicəllənmə, bayğınlıq kimi əlamətlərin meydana çıxması ehtimal edilir. Uzun müddət ərzində istifadə edildikdə, qızdırma, hematuriya, kristaluriya, sianoz, taxikardiya, paresteziyalar, diareya, xolestaz, anuriya ilə müşayiət olunan böyrək çatışmazlığı, toksik hepatit, leykopeniya, aqranulositoz inkişaf edə bilər. Müalicəsi: doza həddinin aşılması baş verdiyi halda, həkimə müraciət etmək tövsiyə olunur. Simptomatik müalicə təyin edilməlidir. Tibbi yardımın göstərilməsi məqsədi ilə mədə 2 %-li natrium hidrokarbonat məhlulu ilə yuyulmalıdır və daxilə, tərkibində aktivləşdirilmiş kömür və ya digər enterosorbentlər olan suspenziya təyin edilməlidir. Çox miqdar mayenin daxilə qəbul edilməsi, sürətləndirilmiş diurez və hemodializin aparılması göstərişdir.

Buraxılış forması

10 tablet stripdə.

Saxlanma şəraiti

25° C-dən yuxarı olmayan temperaturda, orijinal qablaşdırmada və uşaqların əli çatmayan yerdə saxlamaq lazımdır.

Yararlılıq müddəti

5 il. Yararlılıq müddəti bitdikdən sonra istifadə etmək olmaz.

Aptekdən buraxılma şərti

Resept əsasında buraxılır.

İstehsalçı

“Haliçfarm” İSC, Ukrayna. Ukrayna, 79024, Lvov şəh., Oprışkovskaya küç., 6/8.

Qeydiyyat vəsiqəsinin sahibi

“Haliçfarm” İSC, Ukrayna. Ukrayna, 79024, Lvov şəh., Oprışkovskaya küç., 6/8.